學神復出注意！

周俊樂經過3日停賽之後，呢期日賽刑滿披甲，此子雖然仍然係「學神」，但係騎得兼有減磅威力，季尾階段大派用場，就連師傅韋達，在沒有徒弟的日子，攻勢亦告停頓，似係專登等徒弟仔回歸，今次周俊樂接師傅數駒加上外線成手惡馬，各位要金睛火眼睇實了。

雖然周俊樂今季成績理想，但陣上因不小心而被罰，次數相當多，否則頭馬數字可能較現時42W更多。而在4月份亦曾經歷過3日停賽期，本月初復出，即以霍廐「天賦威力」爆出21倍冷W，下風坐騎尚且可以接風，今戰單睇外線坐騎，戰鬥力更加大幅提升，尤其為希、容兩廐效力之「創福威」與「是必飛飛」，更有憧憬必要。

希斯旗下「創福威」，上次初出跑田草1200米，在史卓豐跌鞭下仍得第4，走勢全面露光，由於嫡系騎師停賽，練者安排周同學接手，對於這匹不足一千磅之質新分子，既有減磅之助，發揮上肯定有利無害。其實單以上場作為實力指標，亞軍「聲勢」再出已補中，今仗縱與頭馬「翡翠鳳凰」再碰頭，彼此磅位一來一回，已有大幅差距，反先優勢大大提高。

容廐「是必飛飛」，隨着今季穩定表現，季尾評分高企下，未能突破重磅阻力，表現略為跌Watt，剛跑強項1400米，擺前走直路緊迫失位，潘明輝見大勢已去，並沒有太刻意催騎，但只不過負3個多身位而已，今次改配減5磅的周俊樂可能才是目標所在，睇吓能否取下今季第3W。

至於來自師傅的坐騎，新勝「會長之星」，與周俊樂也是馬夾人緣，歷來兩次合作，命中率百分百，即使重返三班對手轉強，輕磅優勢此消彼長，機會不容低估；尚有跑法機動之「大雷暴」，勇況也是相當穩定，上賽只敗於再出再勝的「星運明爵」及再出再拚第2的「莫浪求」，今仗放頭馬少形勢造就，當視為周同學數胡另一籌碼。