【蹄聲妙影】馬場遇小三 腦筋急轉彎

隨着疫情緩和，賽馬日入場人數逐步增多，東星攞正牌影靚女，就發現一樣嘢，原來女性馬迷多咗好多，馬會喺女士主題賽馬日上嘅宣傳應記一功。除此之外，多咗女士入場，或多或少與疫情有直接關係，去唔到旅行影相打卡已經喊咁口，加上抗疫疲勞，主題公園又去勻晒，反而多咗女士主動向男伴提出，入馬場食吓嘢拍吓拖，好彩贏到錢的話，來個深情擁抱，有助感情昇華。而東星契妹近期密密book馬場餐廳，同男友撐枱腳，仲變埋常客，佢話大熱天時，馬場內有冷氣開放，不失為一個消暑方法。

講開拍拖，最近會員席撞到位中學同學，係男仔嚟，佢老婆一樣係校友，結咗婚好多年，有細路，雖然呢位書友戴住口罩入場，但東星有三隻眼，一望就認到係佢，諗住禮貌上點個頭打招呼，點知視線一轉，赫然發現佢拖住嘅索爆女伴，十指緊扣嗰隻，原來唔係佢老婆，為免尷尬，東星隨即急煞兼扭軚，臨撞一刻好在有位相熟馬主喺廂房露台大叫，問有乜心水，窘境得以大腳解圍，東星連忙抬頭拋一句，買2、7(愛妻)啦！

初步提供:

第5場 3「悅驫」

第7場 10「源源動力」

■東星