【戰況R7】唔係剃鵬鵬眼眉 羅富全：源源動力來投時腳傷好番晒

第7場焦點馬為潘頓策騎嘅2倍全熱門「勝利才子」，沿途守喺貼欄前置位置，但直路騎落唔多，只跑第3。今場頭馬為「源源動力」，此駒於泥地跑近兩場之後，今次大潘唔騎益咗小潘，結果一放到底爆出19倍冷門。希斯初出馬「幸運有您」跑第2，莫雷拉「春風得意」輕描淡寫後上第4。

賽後，練馬師羅富全話「源源動力」對上兩場係失望，但原因可能係跟馬跑，今場就決心搶前自己放，試吓畀馬追，結果「星夢帝國」漏閘，令「源源動力」放順而贏。此駒由容天鵬馬房來投時腳傷已經好番，羅富全形容自己「行運醫生醫病尾」，而此駒今季會再多跑一場先抖暑。

「源源動力」馬主兼議員謝偉俊偕太太白韻琹拉頭馬，仲沿途拖實白韻琹，真係好細心。謝偉俊話愛駒早前曾在操練期間撞傷，因此休息咗一段時間，到後來轉倉，馬匹持續進步，但仍然感謝容天鵬以往嘅付出。對於「源源動力」對上兩仗均在潘頓胯下取得第4名，今場則改用潘明輝，謝偉俊認為兩位騎師表現都很好，但需要視乎臨場發揮及運氣才可分出勝負。值得一提，白韻琹影頭馬相時一度忘記戴口罩，經馬會職員提醒之下，佢先戴好口罩。

第7場賽果：10-5-3-12

組合獨贏3揀1賽果：A3(最後賠率4.6)

二彩賽果：10-5(最後賠率137)