昔日喺立法會見慣見熟 轉到馬場一樣撞到議員

家亨以往任職政治版記者嘅時候，周不時都會去立法會採訪，亦會按工作需要同立法會議員做訪問或者出席記者會，經過一段時間，自然同佢哋熟絡咗，從閒談中得悉，有好幾位議員都係馬主，經常出入馬場支持愛駒。

以剛季為例，家亨先後見過經民聯地產及建造界議員石禮謙(石sir)、議員劉業強、議員謝偉俊(Paul)入場，亦曾經近距離目睹立法會主席梁君彥以嘉賓身份入場頒獎。

喺咁多位議員裡面，石sir同Paul都曾經拉過頭馬，其中Paul今年6月仲帶埋太太白韻琹入場見證愛駒「源源動力」勝出，當時Paul話太太每逢入場嘅話，就會為愛駒帶來好運，結果果次都唔例外。