【變出彩虹】石哥再做白武士 東東開齋在望！

周日好多場都出馬不足，但係咪一定易揀馬、易開熱門？不一定喇。好似第5場四班1600米出馬11匹，熱門「逍遙駒」無錯係場場接近，但實力不算突出，羅廐馬初出我認為也打點折扣；至於另一受注目的「機械戰士」，上季最尾一仗係追得好，但擔心是偶一為之，而且熱門馬最基本就是鬥多次數入圍，呢隻姚廐馬次次靠追又唔算叻，10次又有幾次入到嚟？

是場想買兩隻料有明顯進步的「皇龍司令」及「寶得住」，「皇龍司令」上次季內復出跑田草同程得一席第3，直路一路畀潘頓「影疾」頂住，可謂極之不順，最後輸不足3馬位很不錯了，石哥再用巫顯東似是想助其開齋，更有鬥心且有分頭。至於「寶得住」上季最後一仗第4，陳嘉熙一路打鞭但同隻馬節奏步韻夾唔來，今次隔一個暑期換硬功賀銘年，同程亦曾兩捷，也要睇實。■靈駿