【分秒在握】特利休出可稱王

剛周日C+3欄賽事，不少熱門被塞死，相反前置型馬匹縱放得甚快，依然有本事帶到，各位做功課時不妨備忘。今次「當家猴王」既利休出，又擅直路賽，值捧。

剛戰重頭戲慶典盃，熱到兩倍不到的「達心星」，坐足一條直路包廂，到過終點時仍於內欄未能望空；「樂滿貫」情況好一點，但直路亦有200米是在搵位；至於另一明星馬「肥仔叻叻」，同樣於直路左穿右插取位兼姍姍來遲。這條C+3賽道，取外疊推進又蝕不起，取內疊追趕又有嚴重被阻風險，左右做人難之下，形成不少爆冷賽果。

幸好周五賽事，回師全闊A欄進行情況應有不同，重頭戲G3直路1000米，不少短途好手亦作季內首戰，由於有118分的「顯心星」掛頭牌，因此大部分賽駒都毋須負重磅，甚至不少馬匹要蝕磅上陣。向來休出特佳的「當家猴王」，上季初出贏出全季唯一勝仗，前季初出在港首戰亦得第2，屢屢證明抖夠威力特強。

直路賽八成入Q

值得留意，係「當家猴王」直路路演出特別準，除上季首戰贏出同程外，5戰此程亦得1冠3亞八成入Q。今次賽前工夫做到足，韋達連課摸到實之外，埋門何澤堯試大閘更愈衝愈勁。其實此駒上季已一再證明，跑平磅一級賽處下風，相反在三級賽受讓磅下，則可以將機會提升甚至爭勝，今次同程佳、休出勁，集兩大有利數據於一身，加上還是三級賽，已相隔接近一年未勝，今次條件瓣瓣堅，不捧何待？

■長風