Eason請飲茶 六爺：成件事係巧合！

今朝沙田馬場舉行9草4泥，共13組試閘，有128駒出試，場面夠晒墟冚，其中連贏5個賽馬日的羅富全，派8匹馬參與今早試閘，相信會係馬房第二梯隊，值得加以吼實。

其中有2匹為首度在港試閘的新馬，分別係「伊臣」及「請飲茶」，馬名俱極具叫座力，「伊臣」的英文馬名與歌手陳奕迅洋名一樣叫EASON，相信馬主李伊湄係Eason忠實歌迷。至於「請飲茶」馬名十分夠噱頭，聽到實開心，馬主名字磁力線團體亦夠吊詭，而人稱六爺的全哥就話兩駒同一日試閘只屬巧合，笑言並非想屈Eason今朝請飲茶。

「伊臣」先出試第8組800米草閘，由莫雷拉搶試，可見必屬佳品，試閘走勢亦唔差，末段鬆韁即見加速，點到即止，居中而回。而「請飲茶」則由潘明輝試第13組1050米泥閘，走勢同樣含蓄，緊隨馬群衝線，看來都係輕舒腳頭性質。