柏寶：鼓動係我從騎嘅最佳長途馬

聽日澳洲上演舉國盛事墨爾本盃，馬會亦會轉播兼受注，今屆墨盃焦點落咗喺連贏9場嘅「鼓動」身上，曾憑「翠月」於2012年捧走墨盃嘅鞍上人柏寶甚至認為，如果真係落場跑3200米，「鼓動」應該每次都跑贏「翠月」，同時亦覺得前駒係佢從騎生涯遇上嘅最佳長途馬。

「鼓動」最近3仗由柏寶執韁，先後捧走戴花錦標、東寶錦標及考菲爾德盃3項一級賽，人馬非常合拍，同時亦係今屆墨爾本盃擂台躉。柏寶日前接受訪問時指出，無疑「翠月」固然出色，但與「鼓動」相比係完全唔同嘅賽駒，甚至論長途實力，「鼓動」肯定勝一籌。事關回想「翠月」2012年奪墨盃嘅過程，佢話隻馬準備充足兼狀態好，同時當日步速較慢，結果末段憑本身較佳嘅加速力擊敗對手。

至於「鼓動」，柏寶認為呢匹長途好手非常特別，佢話幾乎搵唔到任何賽駒可以同呢匹墨盃熱門比較，事關佢覺得極少馬匹具備充沛氣量之餘，亦有驚人前速，睇吓呢位今年浴火重生嘅好手，能否憑「鼓動」再奪墨盃啦。