方嘉柏做白武士 霍公子停賽前有馬贏？

跑埋呢期賽事，就有3位騎師停賽，分別係巴度、田泰安同霍宏聲，當中霍公子都最唔好彩，罰完又罰，對於爭取支持唔多唔少都有影響，嚟緊周日仲有鄉里希威森攝位，睇嚟星期三晚一戰，佢都不能掉以輕心。

除咗老爸霍利時支持外，方嘉柏都唔話得，餐士馬「小武士」再度由佢出戰，不過排位就麻麻抽11檔。雖然如此，但亦未必係壞事，因為連埋今仗，已經一連3場排喺呢個檔位，霍宏聲對上兩次表現循序漸進，一次跑第6，上次就心存大欲，可惜遇上潘頓騎「綠續爆發」，以短馬頭飲恨，所以今次再排呢個檔，對於人馬嚟講，可能效果會更理想。

以霍宏聲今季成績，暫時都係谷草成績較理想，而且早前亦為方嘉柏贏過「帆哥兒」，方仔貴為黑夜之神，當然係知人善任，今次得到佢出手相助，睇嚟霍公子響停賽前，都應該有望再響勝鼓。