衛冕無望放眼海外 賈傑美明年遠征杜拜

早前違犯防疫措施，而被罰停賽嘅賈傑美，尋日攞到佢自月初復出以來嘅第4W，但由於馬季展開一段時間，預計今年都無乜機會衛冕冠軍，所以佢話除咗盡力贏馬外，就會期望明年爭取遠征機會。

尋日佢喺費明頓勝出堅尼地讓賽嘅Second Slip，練馬師郭朗堅(Will Clarken)透露只要此駒保持健康進度，與廐侶He`s A Balter、Parsifal，3匹馬一齊遠征明年杜拜嘉年華賽期成數極高，只要落實成行，賈傑美表示一定會答應出席，甚至6月英國皇家雅士谷賽期，亦係賈傑美爭取出席嘅另一目標。

畢竟今季已經無法爭奪蟬聯維省冠軍騎師，遠赴海外贏一級賽，亦是一個很好經驗，而受疫情影響，澳洲賽駒近年甚少遠征機會，已經缺席去年杜拜世界盃賽期，甚至近兩年都無馬出戰香港國際賽，如今再有澳洲頂級騎練計劃參與明年賽事，自然成為賽事亮點，尤其係賈傑美嘅出席，將會成為法國靚女騎師麥晴欣後，另一位新面孔出席是項盛事