G2盟主跑二班賽 黃俊靠輝哥贏多W？

作為弱勢騎師，黃俊絕對明白咩叫做粒粒皆辛苦，上季佢都要等到煞科夜先憑「有苗頭」開齋，今個暑假佢亦早早開工，盡力幫不同練者操馬，希望可以得到更多支持，結果皇天不負有心人，佢喺今個月初憑姚廐「魅影揚飛」開齋，總算打開缺口。

既然幫到手，姚本輝亦樂意給予更多支持，今個禮拜三谷戰，佢將角逐第8場二班谷草1000米嘅「遨遊戰士」交畀黃俊出擊，絕對不能忽視。「遨遊戰士」來港初期成績突出，喺去年4月初更贏過G2短途錦標，可惜近兩季演出一般，最近兩仗分別增程跑1400、1600米亦無走勢，卻換來減分，依家跌至99分可以跑二班，立即轉爭二班谷草1000米，換一批對手兼且有黃俊減5磅之助，睇吓黃俊能否把握機會贏多場。