聲仔翻拍「喜」劇 賀賢梗要揸鏡

自從潘頓於國際賽日墮馬受傷後，到目前還未復出，而騎者當日受傷前，先與賀賢極速攜手起孖，可是此對正值蜜月期的騎練已被逼暫停合作。至於賀賢也不好過，一直守齋至今，馬房暫時錄得10場頭馬而已，還未達安全線，相信都等唔切潘頓復出，係時候開拓新線路。

其中南非年青好手霍宏聲，季內與賀賢合作過3次，分別憑「實力派」及「喜悅精靈」剷入第3，看來好快可擦出火花。周日元旦賽馬日，聲仔立即被委以重任，賀賢除了將「幸運飛彈」(第1場)及「快搏」(第11場)交其過檔，「喜悅精靈」(第3場)更再度交由佢搏殺，續爭田草1200米，銳意拼個明白，日前騎者已替此駒完成最後試跑，雖然今早交由助手代勞，沿大圈外欄快踱，惟賀賢一樣緊張到冇人有，在烽火台二樓食胡位睇到鏡不離手，戰意昭然若揭。