【蹄聲妙影】南丫島居民如何去投注站？

聖誕檔期出現地獄賽程，唔計海外賽，跑完12月27日同12月29日，跟住到傳統元旦日好運1月1，馬迷一定最開心，惟傳媒忙到甩碌呢。有見及此，東星早幾日預先為自己充充電，走咗轉兩日一夜南丫島，其實唔少行家經常去，無他嘅，靚人靚景，自不然成為攝影師「飛佛」。

第一日行程，落船後先醫吓五臟廟，搵咗間茶記嘆杯熱咖啡，點知遇着隔離枱有幾個阿叔講馬經，睇佢哋同啲女侍應關係咁融洽，9成係原居民，其中有個阿叔全程喺度猛呻，但原來唔係呻買唔中，竟然係呻買唔到。呢個moment，頓時撩起東星條癮，繼而打側身兼翹腳，聽吓佢哋講乜先。

原來阿叔唔識用智能電話投注，早輪有期賽事好有心水，諗住準時喺榕樹灣碼頭上船，去中環間投注站搏殺，點知去到中環碼頭落船，卻遇上大塞車，行去干諾道中又遠，結果佢選擇喺番中環碼頭，搭船去長洲投注站，順便買番半打平安包。可是佢上錯隻「慢船」，要坐一粒鐘先到，如果「快船」半粒鐘可到，結果頭場條心水冷Q跑出咗，但阿叔買唔切，所以件事呻到依家，佢仲呻南丫島多達6千居民，馬會不妨喺島上整番間好似長洲咁，外牆有搶包山圖案嘅投注站，畀遊客多個打卡位都好！

初步提供：

第4場5「韋小寶」

第7場10「興高采烈」

■東星