【戰況R8】金鎗再輸！天文學家子嗣雨中摘金！

馬王「金鎗六十」確認轉沉！全日戲肉第8場香港金盃2000米G1，上次未能完成17連勝的「金鎗六十」增程再來，臨場繼續落飛成為1.4倍擂台躉，今場排11檔沿途留後兜出最外欄最佳跑法無遮無阻，但馬兒反應真係同盛時有天淵之別，衝來衝去都未能加速，最終只得第3咋。反而上次在一哩只輸畀「金鎗六十」少少的韋廐「將王」，是場係6.5倍次熱門，呢匹「天文學家」子嗣增程跑2000米可說盡展所長，留前鬥後直路攝個靚位發力，愈走愈勁最終大勝逾4乘返來，跑第2係廐侶57倍大冷門「玖寶」，呢條韋達連贏係派$1,587.5，鞍上人薛恩今季真係好叻，贏完香港短途錦標再奪香港金盃，真真正正係G1 Jockey！

停賽復出即捧大賽的薛恩，賽後話「將王」係一匹有天分同有能力嘅長途好手，好多謝韋達將呢匹馬帥印交畀佢，佢亦大讚韋達讓呢隻馬及時係大賽前提升狀態，今場終於交出馬匹應有能力，順利贏返一場一級賽，佢都非常開心。

第8場賽果：4-10-1-6

組合獨贏3揀1賽果：A2(最後賠率3.1)

勝出練馬師賽果：B3韋達(最後賠率5.8)

二重彩賽果：4-10(最後賠率191)