繼續信方仔 郭富城新寵澳洲2冠2亞

藝人郭富城一向熱愛賽馬運動，自己亦係馬主，先後養過「愛的呼喚」、「愛將」同埋「舞士精神」，後駒11次出賽竹得4冠3亞1季，演出極準，可惜去年6月中因絞腸痧不幸病逝，而城城得悉愛駒離世消息後，亦有發文悼念。

不過，雖然失去「舞士精神」，相隔大半年郭富城又晉身馬主行列，事關日前抵港嘅新一批澳紐G布馬中，烙號G365正正係佢名下嘅3歲澳洲自購馬。呢匹G365於澳洲名為Wardaddy，5戰取得2冠2亞，去年12月18號贏咗一場1250米賽事，演出頗為準繩，同樣交畀佢最信賴嘅方嘉柏訓練，睇吓能否趕及於季尾上陣啦。

值得一提，郭富城之前一直都係引入PPG來港，今次係佢首次購入自購馬，唔知會唔會攞到好成績呢？