一不離二 杜俊誠包辦堅尼經典孖寶

英國打疉周六、日舉行今季首兩項堅尼經典，杜俊誠獲得幸運之神眷顧，24小時之內擸走兩項G1榮耀，先於英國二千堅尼，以藍營副帥身份夥拍「奪標先驅」(Coroebus)，擊敗布宜學騎嘅主力「原野步道」(Native Trail)奪標，跟住昨日舉行嘅一千堅尼，就憑Highclere賽馬團體名下「聲馳千里」(Cachet)，以16倍冷門一放到底贏馬，再次揚威新市場。

昨日舉行嘅英國一千堅尼，總共有13匹3歲馬女參加呢場經典賽，由莫雅策騎兩戰不敗嘅Tenebrism，成為一面倒大熱門，可惜表現失準，全程居於馬群無段好睇，只以第6名過終點。反而由杜俊誠策騎，備受冷落之「聲馳千里」，甫起步即自行領放主宰步速，且放且番下，末段彈甩對手得佔先機，雖然由韓比爾所騎Prosperous Voyage後上甚勁，最終以頸位飲恨跑第二，戴圖理策騎古摩亞之Tuesday跑第3。

現年34歲嘅杜俊誠，更加係從騎以來，首勝二千堅尼及一千堅尼，今年可以一次過嘗盡呢口經典孖寶，而佢亦成為英國賽史上，第5位可以響同年完成經典孖寶嘅騎師，其餘四位，包括咗：佐治摩亞(1967)、柏葛(1970)、范義龍(2005)及莫雅(2015)。