G3硬撼古摩亞藍營 亨亨愛駒只得季軍

昨晚英國車士達賽期，有場視為葉森打吡賽前重要熱身賽2500米G3車士達銀瓶，雖然只係得4匹馬嘅場合，但就唔少得古摩亞同高多芬兩大陣營拗手瓜，而另一亮點就係香港馬主許晉亨名下愛駒，亦都有份參戰。

最終賽果，由莫雅策騎岳伯仁旗下嘅Changingoftheguard，以談笑用兵姿態贏馬，大勝對手6個半馬位，亞軍為布宜學策騎藍營名下New London，而由胡森訓練，許晉亨名下愛駒Savvy Victory由馬昆出戰，再於6馬位之後跑第3，但亦僅以半馬位之先，壓倒由潘大衛跑包尾之Berkshire Rebel。

目前被視為葉森打吡大熱之「盧森堡」(Luxembourg)，莫雅坦言應不會輕易放棄帥權，畢竟大賽始終要有兩手準備，如有任何狀況發生，廐侶Changingoftheguard絕對是不錯後補主力。至於亨亨愛駒Savvy Victory，雖然上仗於潘德法勝出一場2000米，但今戰與高手過招，實力顯然有明顯距離，睇嚟往後部署，仍會以運港服役為最終目標。