多維爾又食大四喜 紀仁安衝冠力追神蘇

今日多維爾馬場舉行紀爾斯大賽，昨日相同場地亦有草、沙混合賽事舉行，全日9場賽果，紀仁安就成為風頭躉食出大四喜，而巴米高亦起孖，另外就只有蘇銘倫、鮑志樂同黎敏滔可以分一杯羹。

呢輪紀仁安表現相當神勇，開季至今原本蘇銘倫响騎師榜嘅成績，一直以大比數帶甩對手，不過踏入8月呢個馬季高峰期，經過前者昨日4W之後，目前蘇銘倫雖然仍以162W領先，但紀仁安已追至152W，縮窄得番10W之距，相信餘下日子，冠軍之爭又會成為兩單打獨打局面，因為排响第3位嘅巴米高，只得88W。

原本蘇銘倫今季表現相當積極，成績一直高踞榜首，不過早前「奮蹈厲」响英國贏日蝕大賽，因為不小心策騎被罰停賽，原本停賽12日，最終上訴減為8日，正好給與紀仁安可乘之機，响佢呢段停賽期間累積15W，加上自神蘇自8月1日復出以來，手風未算太順，復出以來只得3W。

其實比起蘇銘倫為咗重奪失落三屆嘅冠軍騎師銜頭，紀仁安亦都一連兩屆做阿二，先後屈居於布達德同巴米高之後，兩人餘下馬季追逐大戰，比起潘頓同莫雷拉今屆香港爭冠軍，精彩程度都不遑多讓。