美麗系以前有幾多隻 唔係叫美麗？

郭少明家族多年來以「美麗」系命名嘅馬，已經超過70匹，數量真係非常多，高班「美麗」系好似馬王「美麗傳承」、香港一哩錦標冠軍「美麗大師」、現役5W的「美麗同享」大家梗係好有印象，但其餘好多中下班次「美麗」馬，真係搞到亂晒籠，唔知邊隻打邊隻呀。

其實郭家最初養馬時，有部份馬唔係用「美麗」命名，好似郭少明第1匹個人名義養馬嘅，就係叫做「明艷照人」，各位記得嗎？呢匹01年到港嘅「丹山」子嗣，最初係由吳定強訓練，之後轉往呂健威度，響四班摘下2W，馬主可以講開靚個頭。之後尚有02年嘅「靚得精彩」(4W)、07年「靚得開心」、08年「漂亮第一」，而最後一匹非「美麗」馬名郭家馬，相信係10年郭太郭羅桂珍嘅「美的人生」，當年此駒兩度贏四班賽，表現都OK嘅。

至於天字第一號「美麗」系馬，就係04年嘅「終身美麗」，呢匹栗色靚仔馬最初由威哥訓練，更攻下香港打吡預賽，之後轉倉去東廐，06年莎莎日更幫主人家捧走過婦女銀袋，繼後又贏過香港盃預賽，係呢系首匹過百分馬，成績堅係好，可能就係咁，郭生一路沿用「美麗」兩字至今，貪佢夠旺呀~

郭少明家族非美麗馬名戰駒：

01年 明艷照人 2W

02年 靚得精彩 4W

07年 靚得開心 0W

08年 漂亮第一 0W

10年 美的人生 2W