最後一戰凱旋門 55歲巫斯義計劃今年掛靴

香港馬迷熟悉嘅法國名將巫斯義，年初已經事先張揚，計劃明年棄騎從練，籌備喺法國尚蒂伊開倉。隨着考牌及格，老巫掛靴事在必行，佢早前接受訪問時表示，下月舉行嘅法國凱旋門大賽，將會係佢從騎最後一次參與呢項賽事。

正因為係最後一屆出戰，巫斯義坦言期望可爭取佳績，務求為策騎生涯劃上完美句號。原本老巫可以騎番剛於福伊錦標熱身跑獲亞軍嘅「重禮」(Bubble Gift)，不過幾經考慮，終於揀定喺法國橡樹賽以短頸位不敵「凌雪飛」得第二嘅La Parisienne，而上周日紅寶大賽，呢匹3歲馬女喺3駒同到之下，以短距離飲恨得季軍。

巫斯義給予凱旋門坐騎La Parisienne極高評價，實力足與任何對手周旋，若然能夠有變化地之助，更加威力倍增。

巫斯義對上一次贏法國凱旋門大賽，已經係1990年憑「秀茂蘭」（Saumarez）摘冠，相隔32年後，如今老巫以55歲高齡，睇吓能否以光榮勝利告別騎師生涯。