從化副練返港學藝兩週 羅廐逢及時雨

昨日羅富全因確診新冠肺炎，故未見在場督師，惟亦憑「同聲同氣」贏馬，並由副練陳志忠代為領軍，問題不大，馬房亦錄得兩連勝，可是晨課始終需要有人打點馬匹，而忠哥亦身兼課馬工作，冇咗全哥與助手兼兒子的阿濼在場，固然需要從馬房抽調人手幫手睇檔。

不過，上天自有安排，估唔到羅廐從化副練盧百淇剛巧抵港，乃最理想的督操人選，呢場及時雨可謂來得合時，他向《東網》馬經記者表示會由今天開始留港學藝兩週，亦未預料全哥突然確診新冠肺炎，現階段會專注打點晨課工作，確保一切順利，至於從化馬房亦早已調配好人手處理廐務。

周三泥地夜賽，羅廐共6匹參戰馬，其中「大眾勝利」、「保羅承傳」同「黃金甲」俱為從化兵，換言之亦係盧百淇在從化跟進中的馬匹，其中「黃金甲」於9月4日遠征韓國無功而還，且看今戰回師首本泥地一哩，特意搵冠軍騎師潘頓助拳下，能否重現霸氣？