【賽馬以外】咁樣大逃 主隊頂得住嗎？

唔知大家覺得尋日咁有特色嘅谷草日賽點呢？賽事的確無咩睇頭，但見到「赤馬雄風」攞到佢喺谷草一哩第8W，同埋「桃花盛」成為季內首匹3捷馬，再加埋賀銘年起孖，都算幾充實啦。不過，如果講尋日最醒神嘅鏡頭，對筆者嚟講一定係越洋轉播嘅日本賽事，途程2000米一級賽秋季天皇賞，事關出現近年比較少見嘅大逃場面，曾揚威杜拜嘅「本初之海」採取快放戰略，跑到中段已經彈甩馬群一條街，頭1000米造57秒4極速，即刻令人諗起日本嘅異次元逃亡者「無聲鈴鹿」同樣喺秋季天皇賞大逃一幕，但後駒轉彎前斷腳戰死沙場，而「本初之海」就順利完成賽事，只係終點前畀「春秋分」追過屈居亞軍。

成日話賽馬講求留放，有部分人就鍾意睇馬匹後上取勝，但筆者卻對大逃馬有特別好感，事關係賽馬世界，能夠咁樣中段彈甩10幾位馬位，拉士仍能保持勁勢嘅馬匹真係唔多，同埋呢種跑法亦講究騎師喺邊個位發力，拉士隻馬有冇鬥心頂住對手，因此如果想用大逃贏一場賽事，唔係咁易。

喺筆者印象中，香港較為令人難忘嘅大逃賽事，其中一場都係由日本馬炮製，就係喺2015年攻下香港盃嘅「榮進之光」，當日呢匹長途好手喺武豊胯下段段快開，全程領放入直路再彈甩，最後只得另一匹日本代表「新紀錄」追上嚟跑第2名，造出2分0秒6快時間。至於另一場就係「引伸波幅」，講緊已經係2010年3月21號嘅三班田草1800米香港中文大學校友會聯會盃，當時呢匹由黃汝安訓練嘅賽駒，由鄭雨滇策騎抽14檔起步，點知起步無幾耐就見到阿滇搏晒命騎隻馬出嚟放頭，中段已經彈甩好遠，大家當時心知不妙，事關如果咁樣跑輸，鞍上人隨時畀競賽小組抽秤兼罰停賽，點知「引伸波幅」去到最後階段仲有優勢，結果以短馬頭位擊敗後上不及嘅「銀影激光」。

近年日本隊喺香港國際賽取得極好成績，如今疫情放緩，檢疫措施亦無咁煩複，相信會吸引更多海外馬匹參與，「本初之海」睇賽績似乎2000米以上途程嫌長，難怪幕後幫呢隻馬已應邀參戰香港盃，如果呢匹日本又使出尋日嗰招大逃，而沙田馬場條直路比東京競馬場嗰條短咁多，只要畀佢放順走甩，就算「浪漫勇士」最終搵到麥道朗執韁，都唔知追唔追到啦。

■山無陵