【蹄聲妙影】小心呢級天國的階梯

每逢臨近年尾，硬係多嘢發生，尤其戶外工作人士，稍一不慎隨時出意外，輕傷猶自可，重傷入廠就喊到無謂。早一個星期舉行快活谷日賽，細場跑日頭，畫面夠晒新鮮，影出嚟啲相足以回味至今，班龍友就最陶醉，話就話book咗餐廳入場，實質好多個都冇坐低過，一味狂影人和馬，有機飲水飽。

可惜跑到尾兩場，一單都嫌多嘅意外就發生了。事緣有位資深攝記影完相後，一如以往行去馬匹亮相圈旁邊，專為攝記放置相機器材而設嘅長枱之際，竟然唔小心畀枱頭下方嘅一級小梯級絆倒，繼而連人帶機向前仆，但佢身為一個「機客」，自然人機合一而護機心切，千鈞一髮之間瞬即將相機一抱入懷，成個守門員咁，可惜落地嗰下唔靚，搞到左邊膝頭擦損咗，萬幸嘅係冇跌斷骨，否則手停口停。

由於呢記撲救動作幅度大，當堂惹起旁人目光，3名保安聯同2名聖約翰救傷隊救護員立即衝埋嚟，關心一下呢位資深攝記有冇受傷，東星見佢可慢慢起身兼回到神後，拿拿臨擔張膠摺櫈畀佢坐，休息一陣先再開波。

據現場一位資深保安所講，原來呢級天國的階梯曾令唔少人絆倒，記得嘅有6至7單，後生仔都瀨過嘢，至於另一邊枱尾下方反而有條斜路仔，據知當初係畀輪椅過路，但為何仲留住呢級天國的階梯，都幾莫名其妙，既然依家有人出事，真係要諗諗計，畢竟入場人數日漸增多，搵塊斜板頂住先都要。

初步提供:

第2場11「蟲草之凰」

第7場6「心之行」

■東星