重磅有實力一樣OK 布文做典範又夫卜

布文來港客串，打破晒重磅騎師難搵支持嘅說法，以佢身高及體重，都可以講係現役騎師之最，來港至今最低都係騎啲123磅坐騎，以OK哥嘅級數，唔愁無支持，周三晚賽事，更加成為外籍騎師之中，唯一夫卜一位，風頭更勝潘頓同蘇兆輝。

雖然布文少咗好多輕磅實力坐騎，但正因佢重磅，大部分練馬師，反而視之為優勢，搵佢幫手為啲重磅馬操刀，而馬匹相對減少死鉛負擔下，比起搵經驗不足嘅見習騎師減磅出擊，發揮上更加事半功倍。

從實績上，布文騎重磅馬，贏位紀錄都好理想，至今谷草取得3W，「寶賢得得」(135磅)同「躡景追飛」(134磅)兩場1800米溫拿，固然贏得出色，另一頭馬就係「紅磚勇士」(129磅)。

周三夜賽，布文就會騎5匹係重磅馬，而尾場「多多利駒」負124磅，對佢嚟講都已經係最輕磅坐騎。至於6匹重磅坐騎，包括：「管之友」(132磅)、「好拍檔」(133磅)、「飛凡」(134磅)、「財駿」、「對衡之星」兩匹頂磅馬(135磅)、當中梗係不乏實力分子，睇吓OK哥係咪又再成為一批重磅馬嘅救星，繼續交出好成績。