【晨課起筷馬】3場敗仗都輸唔遠 落班有冷味

練馬師苗禮德今季成績大倒退，至今只得2W，位列練馬師榜包尾位置，對上一匹上名馬要數到11月份「是必飛飛」，其實都幾得人驚。以現時廐內兵力嚟睇，絕對唔應該咁樣，今次夜賽派6駒上陣，唔少賽前都做足工夫而臨，隨時可破悶局。

第6場四班1800米，「勝利同盟」3歲愛爾蘭自購馬，到港後跑過3仗均三甲不入，但每仗均咬緊馬群過終點，拒絕大敗，其實只等待緊一個機會。睇番晨課表現，「勝利同盟」季內試過5課大閘，雖然未有亮麗走勢，但近幾課末段均交出不俗追勢，狀態已悄悄提升起來。

拍跳勁勢撲上

上賽後，操練未算積極，但喺12月3日，安排聯同「亟多福」及「簹多福」彈400米泥閘，「勝利同盟」由助手主轡，出閘後前速不及兩匹廐侶，一直落後個多身位，但跑順後最後百餘米即加速撲上，同到終點，姿態輕鬆得來勁度十足，並唔似未服水土之流。今仗減夠分落四班跑，對手實力差一截，當可以秤高多少。

■陳志懷