買田家武士系2串1 有望收錢！

一講起同系人馬孖寶，大家可能會諗起戰馬甚多的「美麗」系、「包裝」系又或者紅黑綵衣的蕭家軍，不過今期谷草夜賽，只出兩駒嘅田北俊家族，都有可能起孖而回，因為兩隻「雅典武士」及「鈁糖武士」都見近況對辦，尤其是「雅典武士」改由何澤堯策騎，發揮令人信賴。此華將今季谷戰已取32W，帶甩26W第2位的潘頓，於谷草演出愈來愈有霸氣，可助「雅典武士」勝回一仗！

第6場四班1200米的「雅典武士」，此匹4歲馬為田北俊夫婦名下，來港前來自好價賽馬集團，外地有同父母胞姐馬5勝1400至1600米，另外在港同母馬「聰明導彈」也取得5捷，可見「雅典武士」血統甚出色。雖然「雅典武士」兩度飲恨跑第2，但一次輸給今季4W馬「純金酒杯」，上仗則是頭兩段放得太快埋唔到尾，被「砂漿金剛」所擒，今次由潘頓改配何澤堯，留放得宜即有力出頭。

第9場三班1200米的柏廐馬「鈁糖武士」，則是田北俊之子田啟文擁有，今季兩次贏馬俱配陳嘉熙跑同程，季初首戰出直路彎發力時被對手閂去跑線，兜入內疊衝刺仍勝。前仗續配此位華將，直路不停分韁下過終點頂住「超額認購」勝出，現評65分三班水平仍未見底。「鈁糖武士」上仗升三班賽跑第5名不俗，今回僅負115磅仍輕，有力取得今季第3W。