今期谷夜 楊明綸繼續做叻仔！

明晚(15日)跑馬地夜賽，4位華將要坐冷板凳，情況當然值得關注。季內已贏得7場頭馬嘅楊明綸(Keith)，最近不時有神來之筆，上周三(8日)先夥拍「和氣生財」跑入Q，而上個月亦憑「勁叻仔」、「中華叻叻」連贏兩日，Keith喺今期夜賽將有7匹坐騎，支持度都算唔錯，以佢嘅坐騎實力都唔係全數下風，有權繼續交到好表現。

當中鄭廐「勁叻仔」，今場挾新勝而臨出戰第4場四班1650米谷草，繼續配Keith上陣。騎者今晨(14日)表示，上仗「勁叻仔」抽得好檔起步，沿途可以喺內欄慳位避免用多咗力，所以末段都交到好好衝刺贏馬，今場要抽10檔起步，無疑形勢上會比上場難應付，屆時亦有可能要以較文靜嘅方式策騎。而Keith又提到，「勁叻仔」喺鄭俊偉訓練下保養得宜，能夠長期保持作戰水準，練馬師當然功不可沒。