【戰況R8】冠軍練馬師姚本輝 首度捧走香港打吡!

2023年03月19日 17:08
東網電視
更多新聞短片
今日第8場一年一度的香港打吡大賽,冠軍級練馬師姚本輝,憑住自己引入的「遨遊氣泡」,從練首度捧走此場總獎金2,400萬大賽!
呢場2000米4歲賽,大熱門係蔡約翰3連勝的2.3倍馬「永遠美麗」,次熱門則為賢廐4連勝3倍馬「新力高升」,早段步速偏慢,「永遠美麗」在潘頓胯下跟前列好好跑,至於「新力高升」則在後面頂在外疊,至於姚廐「遨遊氣泡」,由於排14檔關係,一度留到最後位置,但之後巴度騎住佢率先發力,在外欄亦步亦趨收窄與前列馬距離,入到直路,「永遠美麗」在外欄一度透出,但經驗豐富、韌力較強的「遨遊氣泡」,咬住佢唔放,去到最後100米,「遨遊氣泡」猶有餘勁,終以第1名先到終點,獨贏賠率更冷到46倍,係繼「聖利」之後最冷打吡頭馬,巴度冇咗「福逸」策騎權,卻響今場贏到打吡,淨袋136萬頭馬獎金,堅係吐氣揚眉,賽後仲見到巴度太太同佢錫錫自拍!至於跑第2名,係內欄攝上的另一匹蔡廐馬「自勝者強」,「永遠美麗」只能保住一席第3,郭氏「美麗」系又再與打吡擦身而過。
賽後巴度話心情好興奮,好感謝姚本輝畀個呢個機會,佢話由於抽14檔,只能被迫留後,但話步速唔算快,中段逐步改善位置,佢話隻馬入直路後仲係好好鬥心,佢話呢隻馬好好質素,今次反而可能呢個檔位,令佢哋改變跑法贏到呢場賽事。巴度亦表示賽前並無諗過會贏到今屆打吡,其實今個馬季經歷咗受偒同停賽很多不快經歷,今次能夠贏到呢場大賽,總算一抒悶氣,呢場意外驚喜,亦要多謝姚本輝的精心部署,因為賽前亦用了很多時間商量今場跑法,而馬匹今次一改放頭跑法,亦展現了馬匹極高潛力。
至於姚本輝話今場贏大賽個心情好興奮,但又覺得難以置信,因為冇諗過隻馬真係會贏到,當喺排位抽籤嗰陣抽到14檔個心都實一實,不過2020年薛恩騎「幸福掌聲」跑打吡抽外檔都係中段變奏上,嗰場薛恩跑得好靚,所以賽前都畀咗呢條片巴度睇,希望騎師到時都係咁發揮,巴度都有問過會唔會有兩個計劃,練者自己就話冇,得一個跑法,因為抽14檔都冇辦法,而隻馬陣上真係留到,再喺中段分段加速變奏上前,隻馬都憑藉好好鬥心贏馬。
姚本輝又表示,今次搵咗巴度跑係因為賈傑美一早應承咗方嘉柏騎「喜旺駒」,而巴度係歐洲騎師,歐洲騎師跑長途賽事一向都有保證,所以就搵嚟巴度。
第8場賽果:4-6-2-1
組合獨贏3揀1賽果:A2(最後賠率5.6)
二重彩賽果:4-6(最後賠率590)