唔止親自引入打吡冠軍 輝哥仲搵啱巴度騎！

姚本輝買馬一向有眼光，昔日「靚蝦王」、「蓮華生輝」以至「崇山寶」等馬王級佳駟，都係輝哥引入，而今日呢匹贏出打吡大賽的「遨遊氣泡」，亦都係練者週歲時以38萬澳元投得，如今贏得獎金已經逾2千萬！輝哥賽後接受訪問，話今場贏大賽個心情好興奮，但又覺得難以置信，因為冇諗過隻馬真係會贏到，當喺排位抽籤嗰陣抽到14檔個心都實一實，不過2020年薛恩騎「幸福掌聲」跑打吡抽外檔都係中段變奏上，嗰場薛恩跑得好靚，所以賽前都畀咗呢條片巴度睇，希望騎師到時都係咁發揮，巴度都有問過會唔會有兩個計劃，練者自己就話冇，得一個跑法，因為抽14檔都冇辦法，而隻馬陣上真係留到，再喺中段分段加速變奏上前，隻馬都憑藉好好鬥心贏馬。

姚本輝又表示，今次搵咗巴度跑係因為賈傑美一早應承咗方嘉柏騎「喜旺駒」，而巴度係歐洲騎師，歐洲騎師跑長途賽事一向都有保證，最終就係憑住騎者出色留放，贏出今屆打吡大賽！