望到終點喇 何良唔使玩埋今季執包袱啩

練馬師功力往往透過頭馬數字或大賽成績作反映，但類似何良近季面對嘅困境，相信唔會太多人覺得佢練馬工夫太水皮，事關喺有限兵源下仍能交出如此成績，兼且唔算太多五班頭馬，相當難得啦。

即使再收多一封警告信就要結束練馬生涯，何良今季默默耕耘，喺兵源不足下交出唔錯成績，尋晚谷戰憑「精靈勇駿」增添進帳，為馬房帶來今季第12W，若非「包裝全承」抽外檔姍姍來遲只得亞軍，何廐已經起孖。依家何良只差4W畢業，兼且仲可以贏多一場五班頭馬，只係3月尾，仲有幾個月時間，似乎望到終點，唔敢話非常樂觀，但起麻見到曙光。

當然睇番賽後報告，何廐嘅「木火兄弟」剛周日跑完發現右前腿懸韌帶受傷，應該要抖一段時間，但廐內嘅質新馬「長發」、「謙謙君子」最近走勢唔差，亦獲五班快馬「蒲俠超得」加盟，只要依家起每個月贏1場，下季可以繼續玩啦。