17年都試過馬簿掟方嘉柏 米高可能貪玩遮

17年鄭俊偉掟馬簿報道：

https://bit.ly/3KNf6GA　

尋日馬圈網上熱話，並唔係布文同埋潘頓各自都贏4W，亦唔係「加州星球」同「金鑽貴人」贏二級賽，反而係頭場新馬賽，事關方嘉柏嘅「鈦易搵」擊敗鄭俊偉嘅「富喜來」後，米高哥返回凱旋門準備幫「富喜來」解鞍時，見到準備影頭馬相嘅方嘉柏，突然用佢手上嘅馬簿掟向方仔背脊，整個過程畀人拍到兼擺咗上網，即使引入唔少馬迷議論紛紛，有啲就話鄭俊偉脾氣似乎麻麻地，之前已經試過因為廐內馬匹退出掟馬簿，今次仲因為輸咗掟人。

不過，鄭俊偉同方嘉柏都係性情中人，佢哋關係不嬲唔差，好似係2017年2月26號都發生類似嘅掟馬簿事件，喺當日沙田賽事，方嘉柏嘅「齊齊健康」於何澤堯胯下爆冷，擊敗鄭俊偉嘅「幸運坊」，賽後米高哥都有後用馬簿掟方嘉柏，但兩位倉主當時都係笑笑口，所以今次都唔排除米高都係貪玩嘅，或者知道方仔玩得先咁做，當然如果有另外嘅方式表達自己情緒就更好啦。當然，從今次舉動，都睇到鄭俊偉有幾咁緊張隻「富喜來」，日後不妨再留意啦。