何澤堯禮拜日補祝生日！

剛剛周三晚上，壽星仔何澤堯唔舒服缺陣，結果坐騎取下1冠2亞2季，如果佢騎得就做到騎師王！不過何澤堯好快冇事，今朝仲有操馬，嚟緊周日咪當補祝生日囉，人哋粉絲應援燈箱，都係一路照擺架喇，唔會咁快過氣嘅~

今期Vincent手執唔少實力馬，好似頭場新馬賽「鈦易搵」上次換10磅仔舞唔掂跑第4，今鋪重配贏馬拍檔，補中可期。第5場「營造組裝」連場跑第2輸唔遠，只要有好際遇就有機會出頭。第6場「競駿天下」上次更在五班大勝，若然有變化場地之助，升四班都唔怕呀。第8場遮打盃，何澤堯再夥進步搭上火箭嘅「直線力山」，強如「浪漫勇士」都要擔心呀。仲有第9場4歲「旗幟鬥士」，輸一場打吡後重返1400米，恃級數都要提防。而第10場城城匹「舞林密碼」初出未足都第2，質素有目共睹，何澤堯33歲生日，可以補收禮物喇~