上仗五班大勝 希斯話競駿天下愈來愈放鬆

何澤堯今季狀態大勇，現時已取得76場頭馬，相信季內要取得超過80W指日可待，而佢剛周三(24日)因身體不適而退下火線，翌日生日正日都火速蒲頭，可見其態度專業。

雖然何澤堯今季主要都係騎呂廐或柏廐馬，但能贏到咁多頭馬，都需要拓展唔同線路，今季大衛希斯亦都起用華將一哥，騎練季內合作取得3W，分別係「精彩勇士」、「雅典武士」以及「競駿天下」。其中新勝馬「競駿天下」，今期沙田日賽回升四班，出戰第6場四班田草1400米。

談及「競駿天下」表現，希斯就話此駒初來港時陣上經常犯錯，出閘都有岳頭問題，所以早前曾為佢加戴頭罩以及防沙眼罩，亦都慢慢改善問題，之前除晒所有配備亦都未再有呢個問題發生，證明隻馬不斷進步，而佢嘅近績、陣上走勢亦都慢慢變好，今場回升四班當然有競爭力，不過抽得9檔起步唔易發揮，寄望到時沿用上仗贏馬跑法，跟守領放馬後方競跑。