告東尼獲日本自購馬加盟！

作為亞洲先進賽馬地區，日本馬有幾犀利，相信香港馬迷都好了解，近年亦有唔少日本佳駟遠征香港攞到好成績，應屆香港瓶得主就係日本代表「瑪蓮必勝」。即使日本馬咁犀利，但一直冇乜來自東瀛嘅自購馬或PPG來港服役，依家在港上陣嘅日本PPG，就有韋達嘅「龍來了」同埋鄭俊偉訓練嘅新馬「富喜來」，而遲吓就會有多一匹日本自購馬，事關喺馬會今日公布嘅今季自購馬及自購新馬資料中，名為Lovero嘅日本PP將於聽日抵港，並會加盟告東尼馬房。

頭先睇吓呢匹Lovero嘅背景，父線出自馬迷熟悉嘅「龍王」，8戰出賽取得2冠2亞1季，但此駒卻清一色跑泥地，先後贏過泥地1400、1700米，今年4月中喺泥地1200米跑尾三後就運嚟香港。其實過往曾有一匹「錶之銳」嘅日本PP來港發展，後駒來港前同樣集中跑泥地，結果在港3W均於泥地取得，睇吓今次呢匹Lovero是否都係泥地好手？