3揀1要陸知 轉場力爭4連捷

作為目前騎師榜嘅第二號人物，華將一哥何澤堯依家喺馬圈嘅地位梗係唔簡單，一場賽事隨時有幾隻馬揀，而佢暫時有85W，究竟能否衝擊一季100W呢個壯舉，就要睇吓何澤堯喺剩低幾次賽事能否維持水準。而喺禮拜日沙田賽事，三班田草1400米嗰組，其中3匹正選馬「金佰令」、「神虎龍駒」同埋「陸知」上仗都係由佢執韁，最終佢決定為黎昭昇訓練嘅「陸知」效力，擺明心中有馬啦。

其實，何澤堯有呢個選擇都好正常，話晒「陸知」最近喺佢胯下連贏3場，當然3場都於谷草1650米取得，剛戰升上三班亦只贏「忠誠駒」短頭位，但既然季軍「馬爾代夫」、第7名嘅「信心之選」翌仗都補中，反映此場賽事水準唔差。另外，即使轉爭田草1400米，其實「陸知」開齋頭馬正正於此程取得，當時可以彈甩「健康之星」、「喜勝威龍」及「陽明天空」，因此唔使懷疑前駒嘅1400米能力，即管睇吓何澤堯眼光準唔準，能否喺佢胯下取得4連捷？

想睇更多雅士谷賽期精彩內容，可按下面連結：　

https://rb.gy/ku7vn