告東尼摩加利都要恭恭敬敬 呢位係98歲陳毓麟！

今日第5場賽後，見到摩加利同告東尼兩個咁有份量嘅馬圈人，同時傍住位老人家現身，睇真啲，原來係前香港練馬師飛機陳陳毓麟呀！飛機陳雖然年屆98歲高齡，但精神奕奕，行樓梯上上落落都冇問題！佢稱得上係馬圈傳奇人物，中學時代讀華仁書院，更曾經揸戰鬥機，亦曾任職怡和出入口公司，最初係業餘騎師，73年掛靴辭去文職後，就轉咗做練馬師。90年飛機陳香港退休後更曾轉往澳門練馬，至95年先全身而退，近年仍不時入場，老當益壯呀！