官網放風 遊遍汪洋跑凱旋門呼聲高

日本賽馬團體Carrot Farm日前透過官網，更新旗下馬匹「遊遍汪洋」(Through Seven Seas)嘅近況，並且放風對於參加法國凱旋門大賽持積極態度，成行機會呼之欲出。

對於呢匹已經報咗名今年法國凱旋門大賽嘅日本賽駒，雖然Carrot Farm就無明確表示，只係透露「遊遍汪洋」目前於北方牧場放草，近況唔錯，而且仲話會以其餘日本賽駒遠征沙特及杜拜作為參考，對「遊遍汪洋」遠征法國一事作出真考慮，而且文中更提到，若然遠征未必有合適陪行馬安排，可能只係單獨一匹啟程，字裏行間完全係放風味道。

其實「遊遍汪洋」剛於寶塚紀念賽以頸位不敵「春秋分」跑第2名，雖然話後駒發揮上有多少讓賽之嫌，但亦證明本身實力，絕對可以同外國賽駒拗吓手瓜，而今屆法國凱旋門大賽，首階段報名日本賽駒只得3匹，分別為：「遊遍汪洋」、「盡得真傳」(Dura Erede)與Saliera。