紅褲子出身！呂健威重溫策騎感覺！

騎練喺抖暑期間有咩做？騎師就話可以去外地客串，但練馬師又可以點呢？除咗周遊列國，仲可以去書展，因為香港賽馬會喺書展擺檔，而上季以67W打破個人單季頭馬紀錄嘅呂健威就去咗觀摩，仲試玩現場嘅騎馬遊戲，重現一下當年嘅身手。

點解會話係重現當年嘅身手？皆因呂健威係紅褲子出身，為第2屆見習騎師訓練班學員，1975年至1982年期間擔任騎師，從騎8個季度共取得36場頭馬，或者你會認為平均只係一季贏4、5場，成績唔算太好，但其實又唔係嘅，當年邊有依家有88個賽日，每季跑800幾場馬吖，當然唔算得係成功就真。

呂健威於1996年從練，起步當然唔係一帆風順，首季只得9W，但今時唔同往日，近幾季頭馬數字都過半百，更先後訓練出一級賽盟主「幸運如意」同埋3屆香港馬王「金鎗六十」，勁威水囉！呂健威今次喺書展大顯身手，唔知佢又想唔想親自騎「金鎗六十」，感受下揸法拉利嘅感受呢？