21歲女將奧璇璧 甜度足以抗衡麥晴欣

香港自從蔣嘉琦掛靴之後，已再無女騎師服役，但放眼世界，其實先進賽馬國家有唔少女將馳騁綠茵場，香港馬迷熟識嘅杜苑欣、賈傑美固然犀利，而麥晴欣更獲公認為女騎師之中最驚艷嘅一位。不過，仲有一股勢力不容忽視，就係現年21歲嘅奧璇璧(Saffie Osborne)。

奧璇璧原本係馬術騎師，2021年轉為平地賽騎師，出身賽馬世家嘅佢，父親就係練馬師奧斯本。奧璇璧出道至今勝出130場平地賽事，當中包括今季勝出35W。至於身手，雖然佢未贏過乜嘢大賽，但今晚英皇錦標賽馬日都有上陣，S1-3夥拍「如夢奇緣」衝擊三級賽威勇錦標，而佢喺S1-4及尾場都有坐騎，大家不妨一睹佢究竟係咩料子。

此外，奧璇璧今年將代表女士隊出戰識價盃，隊員包括隊長杜希莉及杜苑欣。