郭富城新馬又擺柏廐！出賽隨時又轟動！

郭富城上季匹「舞林密碼」，次次出現都成為馬場風頭躉，去到季尾6月14日谷草夜賽，城城同老婆方媛一齊在跑馬地支持愛駒，最終「舞林密碼」在何澤堯胯下打開勝門，當晚城城忘我嗌馬片段，仲洗埋各大馬版添，冇計喇，一有城城現身，馬迷萬眾矚目，成個場都即刻炒熱晒呀。

除咗「舞林密碼」，依家郭富城再有新寵，烙號J060、父系為「官方聲明」的澳洲PPG，剛剛運到港，同樣交由方仔主理，呢匹未出賽3歲馬，之前6月份在當地試閘，曾經拋甩對手7個半馬位，睇嚟質素好好噃，睇吓會唔會一出即勝！

過往郭富城名下馬就有「愛的呼喚」、「愛將」、「舞士精神」同「舞林密碼」，如果今次城城改名，大家估會改咩名？會唔會叫「舞林盟主」、「舞林至尊」、「一舞傾城」？定還是會搞搞新意，改做「最激帝國」、「動起來」呢？