東瀛刺客再度南下 劍指考菲爾德盃

由於疫情及檢疫種種原因，自2020年開始再無任何日本佳駟南下澳洲墨爾本參與各項大賽，但今年情況應該有所改變，事關作為澳洲春季嘉年華嘅焦點賽事之一，途程2400米一級賽考菲爾德盃，喺截止報名前共有兩匹日本賽駒參與，分別係2020年日本橡樹大賽季軍「強大必勝」同埋今年喺春季天皇賞攞到第4名嘅「破空極光」。

對於有兩匹日本賽駒報名參加考菲爾德盃，墨爾本馬會賽事執行總監Jake Norton表示非常興奮，因為已經有一段長時間沒有日本馬匹角逐澳洲大賽。值得一提，過往日本賽駒喺呢場賽事成績理想，先後有「愛發達」同埋「白朗冰川」喺2014、2019年勇奪冠軍。值得一提，國際評分達113分嘅「破空極光」亦同時報咗今屆墨爾本盃，初步卜定由日本騎師松山弘平策騎。