貨源有保證 韋達又掃古摩亞靚盤

韋達頂班兵力不足，只得「將王」單天保至尊，雖然仲有匹漸露鋒芒嘅「九五至尊」，但係都要密色揀手貨，部署新季4歲馬經典賽事系列，最新消息，就係佢替旗下馬匹，向古摩亞陣營搜羅揀手貨，終於傾掂咗，曾經係皇家雅士谷，出戰2392米英皇佐治五世錦標跑第3嘅「抱天雷」(Bertinelli)。

雖然圈內充斥唔少古摩亞運港馬匹嘅失敗個案，不過韋達就無呢個問題，單睇佢隻鎮倉寶「將王」，正係出自古摩亞貨源，而今次呢匹「抱天雷」，3歲馬服役至今响英、愛跑咗5場全數上名，取得2冠2亞1季成績亮麗。

近兩場轉戰英國，跑咗兩場二班高水準讓賽，前一仗响樂景傑錦標賽日，取勝於倫敦金盃讓賽，而剛戰就係轉戰皇家雅士谷賽期，雖然欠缺分級賽嘅賽績證明，以本身實而不華嘅表現，相信十三少對於呢啲貨源，能力係點都心還有數。

「抱天雷」嘅父系Justify，貴為2018年美國三冠馬王，而佢嘅配種能力，亦都响佢嘅子嗣成績逐漸得到證明，而「抱天雷」將會成為呢個血統首批運港服役子嗣。