前珠峰冠軍川河達駒退役 去麥維凱牧場享晚年

「川河」系馬主何家駒除咗喺香港養馬，依家世界各地包括英國、澳洲都係佢名下嘅馬上陣，當中最出名一定係2020年嘅珠穆朗瑪峰錦標冠軍「川河達駒」(Classique Legend)。當贏咗呢場全球獎金最高嘅草地賽事後，何家駒決定將「川河達駒」運嚟香港交畀方嘉柏訓練，並出戰同年嘅香港短途錦標，可惜無功而還，其後則因為流鼻血返回澳洲，重返布烈治馬房。

布烈治再次接手「川河達駒」後，一直希望讓呢匹短途好手再闖高峰，可惜此駒卻受到傷患困擾，到咗今年佢亦希望馬兒能夠復出，可惜最近獸醫檢驗嘅結果都唔係太理想，幕後決定讓此駒退役，將會去騎師麥維凱嘅家族牧場安享晚年。

據布烈治透露，「川河達駒」近期操練同喺馬房嘅狀況都好好，可惜上周五幫此駒檢查時，即使馬匹無不良於行，但動作唔係太好，為咗避免任何風險，決定讓馬兒退役。另外，為「川河達駒」攻下珠穆朗瑪峰錦標嘅麥維凱，表示好想照顧呢匹短途好手，馬主何家駒亦決定將愛駒交畀麥維凱嘅家族牧場。