56歲巫斯義想掛靴前再贏墨爾本盃

澳洲好手潘頓喺香港就贏盡一切，但佢一直都好想返祖家揚威墨爾本盃，事關佢從未染指呢場令舉國停頓嘅3200米一級賽。不過，墨盃嘅魅力係就算贏過，都會令人想贏多一次，講緊就係現年56歲嘅法國老將巫斯義，佢喺2010年曾夥拍法國賽駒「美利堅」(Americain)勇奪墨盃，最近佢接受訪問時透露，今年如無意外應該係佢最後一次參與呢項盛事，好希望能夠再贏多次。

巫斯義表示今年好想重返澳洲參與墨爾本盃，佢話會盡一切努力搵坐騎，同埋今次應該係最後一個墨盃，事關佢開始認真考慮掛靴。另外，佢亦提到「美利堅」揚威墨盃就好似尋日發生一樣，為佢帶嚟美好回憶，而佢亦充分感到到澳洲人有幾熱愛墨爾本盃。