考菲爾德盃當熱身 破空極光搵佢做替工…

日本賽駒「破空極光」按照原定計劃，稍後就會運往澳洲，部署出戰墨爾本盃，之前會先以10月21日出戰考菲爾德盃當熱身，不過呢場賽事，並唔係落實出戰墨爾本盃嘅松山弘平，而係搵連達文做替工。

練馬師吉岡辰彌解釋，因為考菲爾德賽期，撞正日本六、日孖Day賽事，分別有G2富士錦標同G1菊花賞兩項重要賽事，松山弘平已經有晒大賽策騎聘約，無法抽身前往澳洲出戰，呢場熱身賽唯有搵外援，連達文近年日本客串大受歡迎，加上對於自家競賽環境嘅熟悉，有佢幫手當然係最理想。

可惜另一匹想跑墨爾本盃嘅「銀亮速」，日前馬主社台集團宣布，馬匹左前腳出現腫脹，正在康復階段，雖然情況並非嚴重，以馬匹健康為大前提，正式放棄遠征墨爾本盃。