郭富城又用名曲改馬名 今次係著迷！

天王郭富城愛車又愛馬，身為馬主嘅佢，過往個人名下養過嘅「愛的呼喚」、「舞士精神」均以佢嘅名曲命名，而現役「舞林密碼」則係佢嘅演唱會名稱。

最新一批新馬命名當中，郭富城愛駒命名為「著迷」，都係以城城名曲來命名，而英文馬名 YOHOHO，正正係《著迷》當中嘅歌詞。

方嘉柏馬房「著迷」為3歲澳洲PPG，出自「官方聲明」(Press Statement)，在港同父馬「凌厲」、「能文能武」等好快就交出成績，相信「著迷」都會早熟兼好快適應到香港競賽環境。

其他新馬命名當中，「精英大師」半同主馬命名為「精選大師」，交畀希斯訓練。蕭家意大利表列賽冠軍改名做「恩尼格」，另一匹蕭氏愛駒則命名為「聖托里尼」，係位於希臘嘅島嶼名稱。