【耀眼精選】回歸舊東家 開鑼即刻開飯！

3年之後又3年，3年之後又3年，10年都嚟緊頭啦！估唔到呢段電影《無間道》嘅經典對白，會響我身上用得着。

大家好，我叫黃家耀，如果閣下聽過我個名，證明你係曾經畀我嘅「山埃貼士」毒害過嘅資深馬迷。小弟喺一份老牌報紙出道，主力寫新馬同海外馬。

09年，可以講係我評馬生涯嘅轉捩點。我喺嗰季第一次將馬匹實力數據化，參考馬會嘅《速勢系統》，結合自己開咗好多晚通宵整理嘅血統資料，發展出一套賽馬分析系統。

經過半年不斷修正，終於取得初步成果，唔單止戶口進帳幾十萬元，更喺報章嘅本地馬貼士榜躍居榜首，海外馬貼士比賽亦以4位數嘅距離大勝對手。雖然成為貼士比賽雙料冠軍，但係為咗測試自己同真正高手嘅距離，喺嗰年嘅季尾決定以賭馬為職業，放棄評馬生涯。

早幾年，小弟以筆名喺某馬經撰寫新馬專欄，再次奪得貼士比賽冠軍。

一代天嬌休後特佳

一別14年，感謝舊東家畀機會，可以再次同讀者交流心得。開鑼日推介「加飯」同「一代天嬌」，「加飯」經過暑假適應明顯進步；「一代天嬌」馬女抖抖埋埋第一鋪特佳，有賠率值得一敲。