【馬場第一攝】暴雨過後有晴天 輝哥搶閘唔等人

姚本輝馬房在季初一樣唔同你客氣，幾大都要搶胡，明晚派6駒上陣，有第2場「上校」，第4場「鑽飾翱翔」，第5場「鼓浪晴天」，第6場「得勝多」，第8場「駿馬快車」及「自然力量 」，今朝所見各駒均有進行例課踱步，備戰動靜也甚有睇頭，值得重點注視。

先要講吓第5場四班1200米件初出馬「鼓浪晴天」，賽前一日由助手騎出大圈踱步，輝哥在烽火台舉鏡睇足全程，以佢慣常操練模式真係好少有，擺明搏殺格，此駒又確實是操足而臨，來港訓練了半年，上星期由巴度試泥地大閘一放而回，前速飛快，就算今鋪排10檔亦不可忽視。

7時正，「上校」及「鑽飾翱翔」在機坪熱身行圈，練者在欄邊金睛火眼檢視著，第2場「上校」用鍾易禮減磅出擊，排4檔畀佢放番嚟唔出奇，第4場「鑽飾翱翔」相隔一星期匆匆再戰，不過四降五形勢唔同晒，上季在五班執兩W，董明朗實同你鍊到盡，有爭勝機會。

早餐料:

第2場:6「上校」

第4場:2「鑽飾翱翔」

第5場:6「鼓浪晴天」

阿藍