匆匆再出！呢隻同我為您部署差唔多

伍鵬志(Pierre)今季開鑼日雖然因身在韓國督師而未能入場，當日練者憑「我為您」開齋亦未能拉頭馬，不過剛戰沙田日賽，佢再派「我為您」升班匆出再戰，結果憑藉輕磅之利再下一城。今期跑馬地夜賽，Pierre再採用相同策略，安排「皇仁福星」相隔7日後再次出賽，此駒將列陣第3場四班1650米賽事。

「皇仁福星」上周三(9月13日)出戰谷草一哩，結果喺主宰步速之下以短馬頭位落敗，Pierre已滿意此駒表現，練者表示上季「皇仁福星」出賽時，唔少騎師賽後匯報馬匹走來略為均速，不過此駒就比較喜歡主動跑法，喺從化試閘亦都係主動領放，所以上周一改跑法試試，不過該仗抽得9檔起步，出閘後需耗力搶前，最後只以短馬頭位落敗，表現已算不過不失，今次匆出幸運地抽到1檔，加上喺少馬場合，都寄望佢可以繼續交出表現。

Pierre又透露，其實未跑上周三一仗之前，已決定為「皇仁福星」報跑今期谷草夜賽，不過上仗就唔算太好彩，寄望今仗抽1檔用少啲力，把握機會補中。