【大跑道】八心之威現虎相

周二共有5匹參戰馬到大圈踱步，除了「駿行星」陳嘉熙試之外，其餘4駒都由助手考驗。「駿行星」神態唔錯；「鼓浪晴天」仍帶點稚嫩；「川河首駒」神態平淡；「電訊巴打」大汗但輕身；「喜旺駒」皮光肉滑。以下是心水推介：

第2場「上校」3月初跑五班賽反彈唔奇，奇在田草照樣得手，季尾四班跑谷草1200米再建功，甚至之後兩戰檔差亦勁揪。今季繼續積極備戰，9月5日試閘輕舒步頭，9日後再於草閘拍跳，全程拍住廐侶「大數據」，走勢夠勁。

第4場「怪獸豪俠」過往唔識放鬆之餘，韁口更好重，密密上陣學到嘢，上季終踏上正軌。今季轉文廐持續進步，昔日缺點盡改，試閘既展現唔錯前速，且全程跑來好放鬆。

第5場「八心之威」上仗賽前試從化閘，大半程放甩6、7個馬位大有轉機，接住上陣跑直路賽純粹熱身，箭頭一早直指今仗首本戲谷草1200米，是時候重現虎相。